एघार हजार भोल्टेजको पोलमा कार ठोकियो ३ जना घाइते बाटो अबरुद्ध

हिजो राति ललितपुरमा बिजुलीको पोलमा ठोक्किएर कार दुर्घटना भएको छ भने कारमा सवार ३ जना घाइते भएका छन । ललितपुरको सातदोबाटो–हात्तीवन ओरालोमा कारको ठक्करबाट बिजुलीको पोल भाँचिएर बीच सडकमा पुगेपछि यातायात आवागमन समेत बन्द गरिएको छ ।

कार दुर्घटना बाट घाइते हुनेहरुमा म्याग्दी घर भएका ४० वर्षीय अमरध्वज पौडेल, ललितपुर गोदावरीका ३२ वर्षीय विशाल विक र सोही ठाउँका २९ वर्षीय मोसेफ लामिछाने रहेका छन् । उनीहरुको पाटन अस्पतालमा उपचार भइरहेको प्रहरी परिसर ललितपुरका एसएसपी श्यामकृष्ण अधिकारीले जानकारी दिए । उनका अनुसार विशालको अवस्था गम्भीर रहेको छ ।

ललितपुर प्रहरीका अनुसार राति ११ बजेर १० मिनेट जाँदा ललितपुर महानगरपालिका -२८ हात्तीवनमा बा १५ च ७६५२ नम्बरको कार बिजुलीको पोलमा ठोक्किएको थियो । कारको अगाडिको भाग क्षतिग्रस्त भएको छ । तीव्र गतिमा रहेको कार आफैं अनियन्त्रित भई दुर्घटना भएको प्रहरीको अनुमान छ । ११ हजार भोल्टको करेन्ट प्रवाह हुने बिजुलीको तार टाँगिएको पोल नै सडकको बीच भागमा रहेकाले सवारी आवागमन बन्द गरिएको हो ।

कार दुर्घटना बाट एघार हजार भोल्टको तार जडान भएको पोल सडकमा पुगेपछी अहिले सातदोबाटो – हात्तीवन – गोदावरी जाने सवारी साधन बन्द गरेर पोल हटाउने कार्य भैरहेको स्थानीयले बताएका छन ।